Nàmbe

Nàmbe dǫ ı̨lè ts’edı, edets’èkeè xè tł’ǫhba yı̀ı nàdè eyıts’ǫ wetı̀ nàke gǫ̀hłı̨ ts’edı. Nezı̨ı̨̀ łı haı̨wǫ ı̨lè eyıts’ǫ nezı̨ı̨̀ edèot’ı̨ wàɂedı ı̨lè. Tetła gà nàmbe ɂı̀hłè łı haı̨wǫ gha. Tabàa k’e texàetła nı̨dè dǫ anahłè, łı yı̨̀ı̨̀chı̀ı edekǫ̀ ts’ǫ̀ naawa. Tł’ǫhbàa ts’ǫǫ̀ naatła taàt’eè ats’ǫǫ̀ edets’ekeè ghàyatıɂà. Ası̀ı wıızı̀ı ts’ıhɂǫ̀ wetè yek’e naetee sı̀ı wetł’axǫǫ̀ łı hanıwo ts’ǫ̀ etła nı̨dè tı wek’e ade ha-le, yèhdı.

Įłàà łı hanıwǫ ts’ǫ̀ èlı̨ ekò wetı̀ nàke tł’ǫhba yı̀ı k’etımogedè ı̨lè. Tı whehtǫ ts’agı̨ı̨de t’à tıtǫǫ̀ ɂǫ̀deèwòo t’à tı wòhdaa wetè k’e xàı̨htò. Nàmbe łı̨ haı̨wǫ gots’ǫ edekǫ̀ nǫ̀ǫtła-le, eyıts’ǫ toò agodaade. Wets’èkeè deh gà łı̨ haı̨wǫ ı̨lè t’à ekǫ yehak’eet’ı̨̀. Nàmbe ı̨łè ets’èɂǫneè gots’ǫ tehàèhtła łı wewà yı̀ı wheɂǫ xè, eyı̀ı tabàa k’e yı̨ı̨ɂà. Ts’èko yets’ǫ̀ ezeh hadı, “Nàmbe, sedǫǫ̀ anet’e nı̀?” yèhdı. “Hęɂę sı̨ aht’ı̨. Dǫ nahłı̨ ha dı̀ı̀, setè nahtsoò adzà t’à. Hòt’a łǫ̀ǫ̀ nàmbe ɂehłı̨,” hadıı̀ t’aa naèhmı̨̀.